ચાલતા ચાલતા રસ્તો પૂછે છે

ચાલતા ચાલતા રસ્તો પૂછે છે ,

બોસ, આજે પગલા કેમ પડતા નથી બરાબર ?

હવામાં લાગો છો !

તમે જ મને કહેતાં હતા કે –

એકસો એંશીની સ્પીડે દોડતા પૈડાઓ ,

તારા બરડા ઉપર સોળ પાડી જાય

એની તને કઈ વેદના થતી નથી ?

અને મેં જવાબ આપેલો –

એ વેદના છૂટા છવાયેલા વ્રુક્ષ્ થઈને

ઉગે છે મારી આસપાસ ,

તમે તો રોજ સાંજે વોક પર નીકળતા હતા

આજે આમ સવાર માં ?

સાંજે ઊંઘ વહેલી આવી ગઈ કે

સવારે ઊંઘ વહેલી ઊડી ગઈ છે ?

બોલો બોસ, કંઈક તો બોલો

આજે પગલા કેમ પડતા નથી બરાબર ?

રસ્તા ને હું કેમ કરી સમજાવું,

કે વોક પર નીકળ્યો નથી અત્યારમાં હું,

નીકળ્યો છું કો’ક બીજાઓનાં ખભાઓ ઉપર,

મારા બને પગ હવામાં છે

અને હું તને ઓળંગી ગયો છું.

 

–   અંકિત ત્રિવેદી

 

સ્વર: અંકિત ત્રિવેદી